1ܘܚܙܹܠܝܼ؛ ܘܗܵܐ؛ ܗ̇ܘ ܦܹܪܵܐ ܟܸܠܝܵܐ ܥܲܠ ܛܘܼܪܵܐ ܕܨܸܗܝܘܿܢ؛ ܘܥܲܡܹܗ ܡܵܐܐ ܘܐܲܪܒܥܝܼ ܘܐܲܪܒܥܵܐ ܐܲܠܦܹ̈ܐ؛ ܕܐܝܼܬ ܠܗ݇ܘܿܢ ܫܸܡܵܐ ܕܝܼܹܗ ܘܫܸܡܵܐ ܕܒܵܒܹܗ ܟܬܝܼܒܼܵܐ ܥܲܠ ܩܸܨܵܝ̈. 2ܘܫܡܸܥܠܝܼ ܩܵܠܵܐ ܡ̣ܢ ܫܡܲܝܵܐ؛ ܐܲܝܟܼ ܩܵܠܵܐ ܕܡ̈ܝܼܵܐ ܪܵܒܵܐ؛ ܘܐܲܝܟܼ ܩܵܠܵܐ ܕܪܲܥܡܵܐ ܓܘܼܪܵܐ؛ ܘܩܵܠܵܐ ܕܫܡܸܥܠܝܼ ܐܲܝܟܼ ܕܡܵܚܝܵܢܹ̈ܐ ܕܩܝܼܬܵܪܹ̈ܐ ܗ݇ܘܵܐ ܕܡܵܚܝܼ ܒܩܝܼܬܵܪ̈ܝ؛ 3ܘܫܵܒܘܿܚܹܐ ܬܸܫܒܘܿܚܬܵܐ ܚܲܕܬܵܐ ܩܵܕ݇ܡ ܬܪܘܿܢܘܿܣ؛ ܘܩܵܕ݇ܡ ܕܐܲܢܹܐ ܚܲܝܘ̈ܵܬܵܐ ܘܕܵܐܢܝܼ ܚܘܵܪ̈ܕܸܩܢܹܐ؛ ܘܠܵܐ ܐ݇ܢܵܫܵܐ ܡܵܨܹܐ ܗ݇ܘܵܐ ܠܸܠܝܵܦܵܐ ܠܗ̇ܝ ܬܸܫܒܘܿܚܬܵܐ ܫܒܼܘܿܩ ܡܐܲܢܹܐ ܡܵܐܐ ܘܐܲܪܒܥܝܼ ܘܐܲܪܒܥܵܐ ܐܲܠܦܹ̈ܐ؛ ܐܵܢܝܼ ܕܙܒܼܝܼܢܹܐ ܡ̣ܢ ܐܲܪܥܵܐ. 4ܐܵܢܝܼ ܝܢܵܐ ܐܲܢܹܐ ܕܥܲܡ ܒܲܟܼܬܵܬܹ̈ܐ ܠܵܐ ܦܸܫܠܗَܘܿܢ ܟ̰ܘܼܦܠܸܢܹܐ؛ ܣܵܒܵܒ ܕܒܬܘܼܠܹ̈ܐ ܝܢܵܐ. ܐܵܢܝܼ ܝܢܵܐ ܐܲܢܹܐ ܕܬܒܸܥܠܘܿܢ ܠܦܹܪܵܐ ܠܟܠ ܕܘܼܟܵܐ ܕܐܵܙܸܠ. ܐܵܢܝܼ ܦܸܫܠܗَܘܿܢ ܙܒܼܝܼܢܹܐ ܡ̣ܢ ܒܢܲܝ̈ܢܵܫܵܐ ܪܹܫܝܼܬܵܐ ܠܐܲܠܵܗܵܐ ܘܠܦܹܪܵܐ. 5ܘܒܦܘܼܡܵܝ ܠܵܐ ܡܫَܟ̰ܸܚܠܵܐ ܕܵܓܵܠܘܼܬܵܐ؛ ܣܵܒܵܒ ܕܠܵܐ ܡܘܼܡܹ̈ܐ ܝܢܵܐ. 6ܘܚܙܹܠܝܼ ܡܲܠܲܐܟܼܵܐ ܐَܚܹܪَܢܵܐ ܟܲܕ ܒܸܦܪܵܚܵܐ ܒܒܹܝܦܲܠܓܵܐ ܕܫܡܲܝܵܐ؛ ܕܐܝܼܬ ܠܹܗ ܐܹܘܵܢܓܵܠܝܼܘܿܢ ܕܠܥܵܠܲܡ؛ ܠܡܲܫܚܘܼܕܹܐ ܠܐܵܢܝܼ ܕܒܸܥܡܵܪܵܐ ܝܢܵܐ ܥܲܠ ܐܲܪܥܵܐ؛ ܘܥܲܠ ܟܠ ܡܸܠܲܬ ܘܐܘܼܓ̰ܵܓܼ ܘܠܸܫܵܢܵܐ ܘܛܵܝܸܦܵܐ؛ 7ܕܒܹܐܡܵܪܵܐ ܒܩܵܠܵܐ ܓܘܼܪܵܐ؛ ܙܕܸܥܡܘܿܢ ܡ̣ܢ ܐܲܠܵܗܵܐ؛ ܘܗܲܒ݇ܠܘܿܢ ܠܹܗ ܬܸܫܒܘܿܚܬܵܐ؛ ܣܵܒܵܒ ܕܐܬܹܠܵܐ ܣܵܥܲܬ ܕܕܝܼܘܵܢܹܗ؛ ܘܣܓܼܘܿܕܘܿܢ ܠܗ̇ܘ ܕܒܪܹܠܹܐ ܠܫܡܲܝܵܐ ܘܠܐܲܪܥܵܐ ܘܠܝܵܡܵܐ ܘܠܥܲܝܢܵܬܹ̈ܐ ܕܡ̈ܝܼܵܐ. 8ܘܡܲܠܲܐܟܼܵܐ ܐَܚܹܪَܢܵܐ؛ ܕܬܪܹܝ؛ ܬܒܸܥܠܹܐ ܐܸܠܹܗ ܟܲܕ ܒܹܐܡܵܪܵܐ؛ ܢܦܸܠܵܐ؛ ܢܦܸܠܵܐ؛ ܒܵܒܹܠ ܗ̇ܝ ܡܕܝܼܢ݇ܬܵܐ ܓܘܼܪܬܵܐ؛ ܗ̇ܝ ܕܡ̣ܢ ܚܲܡܪܵܐ ܕܚܸܡܬܵܐ ܕܙܵܢܝܘܼܬܘܼܗ̇ ܡܘܼܫܬܹܠܵܐ ܠܟܠܵܝܗܝ ܛܵܝܸܦܹ̈ܐ. 9ܘܡܲܠܲܐܟܼܵܐ ܐَܚܹܪَܢܵܐ؛ ܕܬܠܵܬ݇ܐ؛ ܬܒܸܥܠܹܐ ܐܸܠܵܝܗܝ؛ ܟܲܕ ܒܹܐܡܵܪܵܐ ܒܩܵܠܵܐ ܓܘܼܪܵܐ؛ ܐܸܢ ܐ݇ܢܵܫܵܐ ܣܵܓܸܕ ܠܕܵܒܵܐ ܘܠܨܲܠܡܹܗ؛ ܘܩܵܒܸ݁ܠ ܪܘܼܫܡܹܗ ܥܲܠ ܩܸܨܹܗ ܝܲܢ ܥܲܠ ܐܝܼܕܹܗ؛ 10ܐܘܼܦ ܗ̇ܘ ܒܸܬ ܫܵܬܹܐ ܡ̣ܢ ܚܲܡܪܵܐ ܕܚܸܡܬܵܐ ܕܐܲܠܵܗܵܐ؛ ܕܝܼܠܹܗ ܡܙܝܼܓܼܵܐ ܚܵܠܝܼܨ ܒܟܵܣܵܐ ܕܟܲܪܒܹܗ؛ ܘܒܸܬ ܦܵܝܸܫ ܓ̰ܘܼܢܓ̰ܸܪܵܐ ܒܢܘܼܪܵܐ ܘܟܸܒܪܝܼܬ؛ ܩܵܕ݇ܡ ܡܲܠܲܐܟܼܹ̈ܐ ܩܲܕܝܼܫܹ̈ܐ؛ ܘܩܵܕ݇ܡ ܦܹܪܵܐ. 11ܘܬܸܢܵܐ ܕܓ̰ܘܼܢܓ̰ܵܪ̈ܵܝ ܠܥܵܠܡܹ̈ܐ ܕܥܵܠܡܹ̈ܐ ܒܹܐܣܵܩܵܐ ܝܠܹܗ؛ ܘܠܲܝܬ ܠܗ݇ܘܿܢ ܢܝܵܚܵܐ ܐܝܼܡܵܡܵܐ ܘܠܲܝܠܹܐ؛ ܠܐܵܢܝܼ ܕܣܵܓܼܕܝܼ ܠܗ̇ܘ ܕܵܒܵܐ ܘܠܨܲܠܡܹܗ؛ ܘܟܠ ܐ݇ܢܵܫܵܐ ܕܩܵܒܸ݁ܠ ܪܘܼܫܡܵܐ ܕܫܸܡܹܗ. 12ܠܲܐܟܼܵܐ ܝَܠܵܗ̇ ܚܡܵܠܬܵܐ ܕܩܲܕܝܼܫܹ̈ܐ؛ ܐܵܢܝܼ ܕܢܵܛܪܝܼ ܠܦܘܼܩܕܵܢܹ̈ܐ ܕܐܲܠܵܗܵܐ ܘܠܗܲܝܡܵܢܘܼܬܵܐ ܕܝܼܫܘܿܥ. 13ܘܫܡܸܥܠܝܼ ܩܵܠܵܐ ܡ̣ܢ ܫܡܲܝܵܐ ܕܒܹܐܡܵܪܵܐ؛ ܟܬܘܿܒܼ؛ ܛܘܼܒܼܵܢܹ̈ܐ ܝܢܵܐ ܐܵܢܝܼ ܡܝܼܬܹ̈ܐ ܕܒܡܵܪܝܵܐ ܡܵܝܬܝܼ ܡ̣ܢ ܐܵܕܝܼܵܐ ܗܹܐ؛ ܒܹܐܡܵܪܵܐ ܝܠܹܗ ܪܘܼܚܵܐ؛ ܕܡܲܢܝܸܚ ܡ̣ܢ ܓ̰ܵܦܵܝ̈؛ ܘܦܘܼܠܚܵܢܵܝ̈ܗܝ ܒܸܬܒܲܥܝܵܐ ܝܢܵܐ ܥܲܡܵܝܗܝ. 14ܘܚܸܪܝܼ؛ ܘܗܵܐ؛ ܥܢܵܢܵܐ ܚܘܵܪܬܵܐ؛ ܘܥܲܠ ܥܢܵܢܵܐ ܝܬܝܼܒܼܵܐ ܕܒܸܕܡܵܝܵܐ ܗ݇ܘܵܐ ܠܒܪܘܼܢܹܗ ܕܐ݇ܢܵܫܵܐ؛ ܕܐܝܼܬ ܗ݇ܘܵܐ ܠܹܗ ܥܲܠ ܪܹܫܹܗ ܬܵܐܓ̰ ܕܕܲܗܒܼܵܐ؛ ܘܒܐܝܼܕܹܗ ܡܲܓܠܵܐ ܚܵܪܝܼܦܵܐ. 15ܘܡܲܠܲܐܟܼܵܐ ܐَܚܹܪَܢܵܐ ܦܠܸܛܠܹܗ ܡ̣ܢ ܗܲܝܟܠܵܐ؛ ܟܲܕ ܡܲܩܘܘܼܚܹܐ ܒܩܵܠܵܐ ܓܘܼܪܵܐ ܠܗ̇ܘ ܕܝܼܗ݇ܘܵܐ ܝܬܝܼܒܼܵܐ ܥܲܠ ܥܢܵܢܵܐ؛ ܕܪܝܼ ܡܲܓܠܘܼܟܼ ܘܚܨܘܿܕ؛ ܣܵܒܵܒ ܕܐܬܹܠܵܐ ܣܵܥܲܬ ܕܚܸܨܕܵܐ؛ ܣܵܒܵܒ ܕܚܸܨܕܵܐ ܕܐܲܪܥܵܐ ܡܸܛܝܵܐ ܝܠܹܗ. 16ܘܗ̇ܘ ܕܝܼܗ݇ܘܵܐ ܝܬܝܼܒܼܵܐ ܥܲܠ ܥܢܵܢܵܐ ܕܪܹܠܹܐ ܡܲܓܠܵܐ ܕܝܼܹܗ ܥܲܠ ܐܲܪܥܵܐ؛ ܘܦܸܫܠܵܗ̇ ܚܨܝܼܕܬܵܐ ܐܲܪܥܵܐ. 17ܘܡܲܠܲܐܟܼܵܐ ܐَܚܹܪَܢܵܐ ܦܠܸܛܠܹܗ ܡ̣ܢ ܗܲܝܟܠܵܐ ܕܒܫܡܲܝܵܐ؛ ܕܐܝܼܬ ܗ݇ܘܵܐ ܠܹܗ ܐܘܼܦ ܗ̇ܘ ܡܲܓܠܵܐ ܚܵܪܝܼܦܵܐ. 18ܘܡܲܠܲܐܟܼܵܐ ܐَܚܹܪَܢܵܐ ܦܠܸܛܠܹܗ ܡ̣ܢ ܡܲܕܒܚܵܐ؛ ܗ̇ܘ ܕܐܝܼܬ ܠܹܗ ܗܘܼܟܡܵܐ ܥܲܠ ܢܘܼܪܵܐ؛ ܘܡܘܼܩܘܸܚܠܹܗ ܒܡܲܩܘܲܚܬܵܐ ܓܘܼܪܬܵܐ ܠܗ̇ܘ ܕܐܝܼܬ ܗ݇ܘܵܐ ܠܹܗ ܡܲܓܠܵܐ ܚܵܪܝܼܦܵܐ؛ ܟܲܕ ܒܹܐܡܵܪܵܐ؛ ܕܪܝܼ ܡܲܓܠܘܼܟܼ ܚܵܪܝܼܦܵܐ؛ ܘܩܛܘܿܦ ܠܩܘܼܢܛܵܝܦܹ̈ܐ ܕܐܲܪܥܵܐ؛ ܣܵܒܵܒ ܕܡܛܹܠܘܿܢ ܥܲܢܒܼܘܼ̈ܗ̇. 19ܘܕܪܹܠܹܐ ܡܲܠܲܐܟܼܵܐ ܡܲܓܠܹܗ ܒܐܲܪܥܵܐ؛ ܘܩܛܸܦܠܹܐ ܠܓܸܦܬܵܐ ܕܐܲܪܥܵܐ؛ ܘܕܪܹܠܹܐ ܓܵܘ ܡܲܥܨܲܪܬܵܐ ܓܘܼܪܬܵܐ ܕܚܸܡܬܹܗ ܕܐܲܠܵܗܵܐ. 20ܘܦܸܫܠܵܗ̇ ܡܪܥܝܼܟ̰ܬܵܐ ܡܲܥܨܲܪܬܵܐ ܠܒܼܲܕܲܪ ܡ̣ܢ ܡܕܝܼܢ݇ܬܵܐ؛ ܘܦܠܸܛܠܹܗ ܕܸܡܵܐ ܡ̣ܢ ܡܲܥܨܵܪܬܵܐ ܗܲܠ ܠܵܥܡܹ̈ܐ ܕܣܘܼܣܵܘܵܬܹ̈ܐ؛ ܡ̣ܢ ܐܸܣܛ̈ܕܵܘܵܬܵܐ ܐܲܠܦܵܐ ܘܐܸܫܸܬܡܵܐܐ.